МҰСЫЛМАНБЕКОВ ҚАНИ ЖҰМКЕНҰЛЫ!

Мұсылманбеков Қани Жұмкенұлы!

«Қарағанды облысының Құрметті азаматы» атағыныз  құтты болсын. Сіздің Қазақстан Республикасының денсаулық сақтау саласын дамытуға қосқан жеке үлесіңіз және көп жылғы жемісті еңбегіңіз Отан алдындағы сөзсіз қызметтеріңіздің мойындалғанының айғағы. Сізге шын жүректен зор денсаулық, бақыт, қажымас қайрат, амандық тілейміз. 

Қани Жұмкенұлы Мұсылманбеков – жоғары білікті хирург-онколог, кеуде қуысының қатерлі ісігі бар науқастарды хирургиялық емдеудің ұйымдастырушысы, денсаулық сақтау саласының ардагері, медицина ғылымдарының докторы, профессор, Мемлекеттік сыйлықтың лауреаты.

Ол 1934 жылы дүниеге келген. 1957 жылы Қарағанды мемлекеттік медицина институтын бітірген. Жезқазған кенішінде учаскелік терапевт, кейін Қарағанды қалалық №11 ауруханасында хирург болып жұмыс істеген.

1960 жылы Мәскеу қаласындағы КСРО АМН эксперименттік және клиникалық онкология институтында клиникалық онкология бойынша аспирантураға түсіп, 1963 жылы тәмәмдады. Осы жылы Қарағанды облыстық онкологиялық диспансеріне дәрігер ординатор болып қызметке кірісті, 1964 жылы жаңадан ұйымдастырылған торакальды бөліміне бөлім меңгерушісі болып тағайындалды.

Қани Мұсылманбеков Қазақстанда бірінші болып асқазанның, өңештің және өкпенің проксимальды обырына шалдыққан науқастарға сәтті ота жасады. Хирург өңешті бір мезгілде резекциялау әдісін әзірледі. 1970 жылы облыстық онкологиялық диспансердің бас дәрігері болып тағайындалды.

1972 жылы Қарағанды мемлекеттік медицина институтының онкология курсы бойынша бөлім меңгерушісі қызметіне ауыстырылды.

«Өңеш қатерлі ісігін емдеу» тақырыбындағы докторлық диссертациясы оның ұзақ жылдар бойғы қажырлы еңбегінің нәтижесі болды, Институттың емдеу ісі жөніндегі проректоры қызметін де атқарды.

2002 жылдан — Қани Мұсулманбеков Онкология және сәулелік терапия кафедрасының профессоры. 2005 жылы жоғары оқу орнынан кейінгі медициналық білім беру факультетінің онкология және радиология кафедрасының меңгерушісі болып тағайындалды.

Қани Жұмкенұлы Мұсылманбеков «Еңбек ардагері» медалімен, Қазақ КСРО Жоғарғы Кеңесі Президиумының Құрмет грамотасымен марапатталған. «Қазақстанның еңбек сіңірген қайраткерлері» атағымен марапатталған. Ол Жаңаарқа ауданының және Қарағанды қаласының құрметті азаматы.

  2022 жылдың 22 қазанында Қарағанды облысының әкімі Республика күніне орай  Қани Жұмкенұлына «Қарағанды облысының Құрметті азаматы» атағын берді.